ಕರಿಮುಗಿಲಿನ ಸೆರಗಂಚಲಿ ಬಿಳಿಚುಕ್ಕಿಯ ಕಿರಣಮೂಡಲು ಮನ ಕರಗುತ್ತಿರೆ ಹನಿ ಹನಿಗಳ ಮಿಲನ.
ಹೊಸ ರಾಗದ ಹೊಸ ಭಾವದ ಹೊಸ ಬದುಕಿನ ಕವನ ,
ಪಲ್ಲವಿಯಲಿ ಅವಳಿರುತಿರೆ ಆನಂದವೇ ಚರಣ .
ಕಾರಿರುಳಲಿ ಕವಿದಿರಲು ಕಹಿನೆನಪಿನ ಶೂನ್ಯ,
ಆ ಕಂಗಳ ಶಶಿಕಾಂತಿಯೇ ಜೀವಕೆ ಚೈತನ್ಯ.
ತಂಗಾಳಿಯು ಹರಿಸುತ್ತಿರೆ ಬಿಸಿಯುಸಿರಿನ ಧಾರೆ,
ಆ ಸ್ಪರ್ಶದ ಉತ್ಕರ್ಷವೆ ಆತ್ಮತಮೋಹಾರಿ.
ಕನ್ನಡಿಯಲಿ ಕೈತಾಕಿದ ಸವಿಗನಸಿನ ಪ್ರೀತಿ,
ಎಂದಾದರೂ ದೊರಕುವುದೇ ? ನನಗೆಲ್ಲೋ ಭ್ರಾಂತಿ.
ಎದೆಗಪ್ಪಿದ ಒಲವಿಂದು ನಿಲುಕದ ನಕ್ಷತ್ರ,
ನೆನಪೊಂದೇ ಶಾಶ್ವತವು ಉಸಿರಿದು ನೆಪಮಾತ್ರ......
