ಮೌನದ ಹಾಡು.....ನೆನಪಿನ ಜಾಡು

ದಿನವೂ ನಡೆಯುತ್ತಿದ್ದ ದಾರಿ ಇದ್ದಕ್ಕಿದ್ದಂತೆ ಹೊಸತೇನೋ ಎನ್ನುವಂತಹ ಅಭದ್ರ ಭಾವನೆ .... ಜೊತೆ ಜೊತೆಗೆ ನಗುತ್ತ , ಮಾತನಾಡುತ್ತ , ವಿಷಯಗಳ ಬಗ್ಗೆ ಚರ್ಚಿಸುತ್ತ ನಡೆದ ಹಾದಿ ಇದೇನಾ ಎನ್ನುವಂತ ಪ್ರಶ್ನೆ ಕೆಲವೊಮ್ಮೆ ಧುತ್ತನೆ ಎದುರಾಗುತ್ತದೆ. ಎಂದೋ ಆಡಿದ ಮಾತುಗಳು ಪುನಃ ಪುನಃ ಕಿವಿಯಲ್ಲಿ ಅನುರಣಿಸುತ್ತವೆ. ಆ ಮೌನ ಸಂಭಾಷಣೆಗೆ ಹೆಸರು ಕೊಡುವ ಧೈರ್ಯ ಆಗಲೂ ಇರಲಿಲ್ಲ, ಬಹುಶ ಈಗಲೂ ಇಲ್ಲ... ಇವುಗಳು ಎಲ್ಲರನ್ನು ಒಂದಲ್ಲ ಒಂದು ಬಾರಿ ಕಾಡಿರುತ್ತದೆ ,ಆದರೆ ಅದನ್ನು ಅರ್ಥೈಸುವ ಪ್ರಜ್ಞೆ ಅಥವಾ ತಿಳುವಳಿಕೆ (?) ಬೇಕೆಂದೇ ನಮ್ಮಲ್ಲಿ ಕೊಟ್ಟಿಲ್ಲವೇನೋ ಆ ಮೇಲಿನವನು .........ಇದನ್ನು ವಿಪರ್ಯಾಸ ಎನ್ನುವುದೋ , ಅಥವಾ ಬದುಕಿನ ಯಾವುದೋ ಹಂತದಲ್ಲಿ ಇದನ್ನು ನೆನಪಿಸಿ ಮುಗುಳ್ನಗುವನ್ನು ತರಿಸುವ ಒಂದು ಸಿಹಿಯಾದ ಮೋಸ ಎನ್ನುವುದೋ ಅವರವರ ಭಾವಕ್ಕೆ ಬಿಟ್ಟಿದ್ದು......